R I P S P A I

No har ikkje eg plass til meir ripssaft i frysa, så då må ripsen brukas til noko anna. Då er det friskt og godt med ein ripspai. Lun ripspai er nydeleg saman med vaniljeis, eller litt piska kremfløte. 

Mørdeig 

300 g kveitemjøl 

200 g margarin 

100 g melis 

60 g egg 

1 ts vaniljesukker 

Bland alt godt saman til ein god deig.  

Du vil få ein del mørdeig til overs, denne kan frysas og brukas ved ei anna anledning. Då er det berre til å tine den ved romtemperatur, og kjevle ut på ny. 

Montering av paien 

Mørdeig 

Vaniljekrem(kjøpt eller heimelaga)

Rips 

Sukker

Kjevle mørdeigen til den er 2-3mm tjukk. Legg mørdeigen i ei smurt paiform. Fyll forma halvt opp med vaniljekrem, dekk så vaniljekremen med eit godt lag rips. Strø litt sukker over ripsen. Skjær mørdeigen i tynne strimler, legg strimlene i eit fint mønster oppå paien. Pensle strimlene med egg. 

Steik paien ved 170 grader, nederst i omnen, til paideigen er blitt gylden i fargen. Tida vil variere alt etter storleiken på paien. 

M O R E L L K A K E

Morellane er i sesong på min kant av landet. Og morellar er så utruleg saftig og godt! Me har eitt morelltre i hagen, dei fleste åra har dette gitt oss to-tre morellar, men i år har det vore fleire titalls. Og søte og gode er dei og. Det fortente ei kake!

Morellkake:

220 g smør

500 g brunt sukker

15 g vaniljesukker 

15 g kakao

30 g honning

1 knivsodd salt

200 g mørk sjokolade (mellom 50-70% kakaoinnhald. Eg brukte Valrhona sjokoladen Caraibe her, den har 66% kakaoinnhald. Freia sin Dronningsjokolade er og god, og den er trass alt mykje lettare å få kjøpt. )

4 egg

225 g mjøl

1 ts bakepulver

200 g melkesjokolade (Om du er mest glad i mørk sjokolade kan du bruke ein med 50-70% kakaoinnhald her og.)

Nyplukka norske morellar

Slik gjer du: 

1. Smelt smøret i ei gryte.

2. Rør brunt sukker, kakao, honning, vaniljesukker og salt inn i det smelta smøret.

3. Ha i sjokoladen, rør til sjokoladen er smelta i den varme massen.

4. Rør inn egga, eitt om gongen.

5. Bland inn mjøl og bakepulver, rør til det er ein jamn masse.

6. Hell røra over i ei bakepapirkledt langpanne, eg har brukt både den store originale som høyrer til komfyren, og eg har brukt ei litt mindre langpanne med lokk. Bruker du ei slik litt mindre, med lokk, då må du forlenge steiketida noko.

7. Steik kaka i forvarma omn, midterste rille, 175°C i omlag 17 minutt. Kaka skal vere litt seig.

8. Legg på 200 g sjokolade med ei gong kaka er tatt ut av omnen, la det stå for seg sjølv i 10 minutt, no er sjokoladen smelta og du kan bre den jamnt utover kaka. ( Takk til Anita Riskedal for tipset om å legge sjokolade oppå ei kake på denne måten, absolutt ikkje siste gongen det kjem ei oppskrift med dette!)

9. La kaka stå i eit kaldt rom, i forma, slik at sjokoladen får stivne heilt.

10. Skjær opp kaka i små stykker når den er kald/sjokoladen er stivna. Om du vil ha ei rund kake, kan du berre stikke den ut med ei rund form. 

Kaka kan frysas, og er like god når du tek den opp igjen. Den tiner fort på kjøkkenbenken. Du kan ikkje fryse den etter at du har hatt morellar og fløyte på, fløyten tek lang tid på å tine og morellen er ikkje fast og fin etter opptining. Difor lager eg ikkje klar med krem og morell meir enn det eg trur me skal ete. Kaka er god som den er utan noko oppå og, så frys ned det som ikkje skal brukas.

Krem:

1,5 dl fløyte

1 ss sukker

1 ts vaniljesukker

11. Pisk saman alt til ein krem, viktig å ikkje piske for mykje. Kremen skal halde formen, men den skal ikkje vere kornete eller skilje seg. 

12. Ha kremen i sprøytepose/plastpose med for eksempel ein stjernetyll. Sprøyt små topper på kakene. (Oppskrifta på krem er berre nok til noko av sjokoladekaka, så du må auke oppskrifta med fløyte noko om du skal lage klar heile kaka på ei gong.)

13. Ringle over litt morellsirup, det gjer god smak og fin farge. (Kan godt kutte ut om du ikkje har.) 

14. Pynt med morellar, og litt hakka sjokolade. 

15. Oppbevar kaka i kjøleskapet etter at du har hatt fløyten på. 

J O R D B Æ R S A F T

Jordbærsaft er noko eg lenge har tenkt på å lage, men steget frå å tenke til å gjere, kan vere nokså langt nokre gonger.  

No har eg då endeleg kjøpt inn nyplukka og søte jordbær frå Fister, blanda saman og kokt opp. Resultatet svarte til forventningane, og blei utruleg friskt og godt. Safta kan både blandas med vatn og drikkas, eg kan ha den i ismaskinen og lage sorbet, eller eg kan redusere den til sirup seinare. Jordbærsirupen vil då vere heilt nydeleg i konfekt, og som smakstilsetting i ganache.

Oppskrift:

1200 g nyplukka jordbær(norske)

7 dl vatn 

500 g sukker 

15 g sitronsyre

Slik gjer du:

Vask jordbæra, skjær vekk det grøne. Ha jordbær, vatn, sukker og sitronsyre i ei gryte. Kok opp, når jordbæra er mjuke stamper du dei slik at du får ut mest mogleg saft. Kok i ca. 10-15 min. Sil alt gjennom ei saftsil, ikkje tving safta gjennom, la det renne sjølv. Då vert safta blank og fin. Hell safta over på flasker, og frys. 

Restane av jordbær som ligg igjen oppi saftsila er no blitt til tjukt og godt syltetøy, hell det over i ei skål, og nyt.

V A N I L J E S U K K E R

Vaniljestenger er dyrt å kjøpe inn, men det er verdt det, for det er så utruleg godt. Det eg har gjort i mange år er å kaste vaniljestengene etter kvart som eg har brukt dei. Og så har eg samtidig kjøpt ekte vaniljesukker på boks.

For det fins faktisk ekte og uekte vaniljesukker, det som er ekte inneheld dei karakteristiske svarte vaniljefrø «prikkane». Uekte vaniljesukker har ingenting med vanilje å gjere, men det inneheld vanillin som er eit syntetisk framstilt stoff som kjem frå bartrer. Det gjev og heilt grei smak, men skal vaniljesmaken vere verkeleg framtredande i det du lager er det best å bruke ekte vanilje. 

Tilbake til alle desse vaniljestengene eg har brukt i mine år på kjøkken, som eg har kasta etter at eg har skrapt ut frøa, og kokt dei opp i væske. Eg angrar no. Eg har lenge visst at ein kan lage sitt eige vaniljesukker, og no har eg då altså gjort det. 

Eg har samla brukte vaniljestenger i nokre veker. Svigermor har og hjulpe meg, og kome til meg med dei ho har brukt. Då er alle frøa skrapt ut, i tillegg er dei blitt kokt i væske ( for eksempel is, panna cotta og andre ting.) 

Når du har brukt vaniljestanga ein gong så skyller du den godt i kaldt vatn, slik at den er rein. Så legg du den til tørk på ein tallerk på kjøkkenbenken, og no må du ikkje dekke til vaniljestanga, du må la den ligge ope til tørk nokre døgn. Når den er heilt sprø, og all fuktigheit er ute av den kan du legge den i ein boks. Men om det er litt fuktighet igjen i stanga, og ein legg den i ein tett behaldar, då vil det koma bakterievekst og mugg. Så pass på å la den ligge ope så lenge at den er heilt sprø og tørr. Slik gjer du kvar gong du bruker ei vaniljestang, så samlar du alle i same boksen. Når ein har samla 4-6 vaniljestenger er ein klar til å lage sitt eige vaniljesukker. 

Dette treng du: 

200 gr sukker

4-6 tørre og brukte vaniljestenger (les teksten ovanfor for å forstå kva eg meiner med «tørre og brukte») 

Slik gjer du: 

1. Kjør saman sukker og vaniljestenger i ein foodprocessor, med kniv. Kjør det godt til sukkeret ser ut som melis, og vaniljestengene er heilt knust. 

2. Ta det på lufttette behaldarar/glas. 

No har du ekte vaniljesukker utan nokon form for konserveringsmidlar, heimelaga og godt. Det er har lang haldbarheit så lenge det er oppbevart tørt. Dette er og ei flott gåve å gje vekk til andre. Ein bruker dette vaniljesukkeret akkurat likt som anna vaniljesukker.

C R É M E B R Û L É I S

No har eg eksperimentert meg fram til mykje forskjellig saman med ismaskinen min, og her kjem nok ein smaksvariant som eg likte godt.

Denne gongen er det Créme brûlé eg tenkjer på når eg et isen, difor har den fått namnet sitt etter denne desserten.

Créme brûlé is

3 dl fløyte

2 dl h-melk 

½ vaniljestang 

130 g sukker 

4 eggeplommer 

1 knivsodd salt 

Slik gjer du: 

1. Ha fløyte, mjølk, vaniljestang og sukker i ei gryte. Varm dette til kokepunktet. 

2. Pisk saman eggeplommer og salt i ein eigen bolle. 

3. Ta ut vaniljestanga frå fløytemjølka. 

4. Hell den varme fløytemjølka over eggeplommene, visp medan du heller. 

5. Hell alt tilbake i gryta igjen, varm alt på middels temperatur til eggeplommene begynner å koagulere. No vil ismassen tjukne ved hjelp av eggeplommene. Rør i gryta når du ser at massen byrjar å bli varm, det skal ikkje koke, men det vil tjukne rett under kokepunktet (ca 89°C. Ta gryta av varmen med ei gong du ser det har tjukna, hell det så over i ein bolle. 

6. Kjøl ismassen ned i kjøleskapet, gjerne over natta. (I alle fall nokre timar, slik at den er kald før ein kjører den i ismaskinen.) 

7. Kjør massen i ismaskinen, ha isen over i ein behaldar. Legg eit lag med plastfolie heilt nedtil isen, slik at det vert lufttett mellom isen og plastfolien. Ha på lokk, legg i frysa. Isen må stå nokre timar i fryseboksen for å bli skikkeleg kald, og for å få rette konsistensen. Isen held seg i fleire veker i fryseboksen. 

Karamell

1 ½ dl fløyte 

200 gr sukker 

125 gr kaldt smør 

1 ts havsalt 

Slik gjer du: 

1. Skjær kaldt smør i små terningar, sett inn i kjøleskapet igjen.

2. Ha fløyten i ei gryte, varm denne opp på svakaste varme, den skal berre bli varm, den må ikkje koke.

3. Medan fløyten vert oppvarma skal du ha sukkeret i ei anna gryte. Gryta med sukker skal du ha på middels varme, ikkje rør i sukkeret før du ser at det har begynt å smelte ved kantane. No kan du røre forsiktig i sukkeret, og det skal varmas opp til 170-175°C.

4. Tilsett smøret i det varme sukkeret, rør om.

5. Tilsett den varme fløyten i ei tynn stråle, medan du rører.

6. Rør til blandinga er jamn og fin, det skal ikkje vere sukkerklumpar i denne karamellen no. Om du har fått sukkerklumpar må du berre varme karamellen forsiktig opp igjen i gryta, og røre i den heilt til det ikkje er nokon klumpar igjen. 

7. Rør i saltet, smak til om du vil ha meir salt. 

8. Avkjøl i ein bolle/skål. 

Denne karamellen er verdas beste karamellkrem/saus. Oppskrifta på karamell er inspirert av Linda Lomelino, og står i boka «Sweet food and photography». 

Eg har berre gjort nokre små forandringar på hennar oppskrift, og lagt inn nokre av mine erfaringar. Den er og godt eigna til å frysas, og den er tint med ei gong du tek den ut for å bruke den. Eg frys den ofte i sprøytepose. 

Denne karamellen er deilig å ha oppå Créme brûlé isen, den erstattar brent sukker som opprinneleg skal vere oppå Créme brûlé.

S O M M A R K A K E

No er det nære på at den norske jordbærsesongen er i gang. Det er like frydefullt kvart år. Rundt her som eg bur kjem det då opp fleire bord langs med vegen der det er mogeleg å få kjøpt nyplukka jordbær direkte frå den som dyrkar dei. Det ser eg på som ei gåve til lokalsamfunnet. 

 Jordbæra er gode akkurat som dei er, men dei er og utruleg gode og fine til kaker. Eg har difor komponert ei kake som kan vere til nytte og glede no i starten av sommaren. 

Moccabotn: 

300 g brunt sukker 

300 g kveitemjøl 

200 g kvitt sukker 

100 g mørk sjokolade 

1 ss kakao

1 ss natron 

1 ½ ts bakepulver 

2 ts salt 

3 egg 

4 dl h-melk 

50 g smør 

3 dl varm kaffe 

Visp egga lett saman, du treng ikkje bruke maskin. Varm melka slik at den er lunken, smelt smør, visp begge deler inn med egga. Bland inn brunt- og kvitt sukker, kveitemjøl, kakao, natron, bakepulver og salt, rør saman til ei jamn røre. Tilsett varm kaffe og smelta sjokolade, rør til ei glatt røre. 

Ha bakepapir i kakeforma/formene. Eg liker å lage mange små botnar på ei gong. Så lenge du har plass til formene på eit steikebrett går det fint å steike mange botnar på ei gong. Ikkje fyll i formene meir enn 2/3 opp til kanten. Steik botnane midt i omnen på 160°C, i ca. 35 - 40 min. Bruk ein strikkepinne eller ein kniv til å sjekke om botnane er ferdige, stikk då denne i midten av kakebotnane, om det ikkje heng deig igjen på kniven/strikkepinnen er botnane ferdige. Botnane må avkjølas heilt før du tek dei ut av formene. 

Mascarponekrem: 

250 g mascarpone 

4 ss melis 

2 ts ekte vaniljesukker 

1,5 dl fløyte 

Bruk ein handmixar eller ein kjøkkenmaskin til å piske saman mascarpone, vaniljesukker og melis. Ha så i fløyten, pisk vidare til den er tjukk og luftig. Den skal vere god og lett å smørje ut, men pass på å ikkje piske for lenge. Du må stå ved maskinen heile tida for å passe på, slik at kremen ikkje skil seg. Stopp maskinen med ei gong du ser at kremen er så tjukk at den kan halde formen når du smørjer eller sprøyter den ut. 

Montering av kaka: 

Del moccabotnen i to eller tre delar med ein konditorkniv eller ein brødkniv. Legg ein av delene oppå kakefatet, dynk botnen med kaffi. Når du dynker har du kaffi i ein kopp, og bruker ei skei til å fordele litt kaffi jamnt utover botnen. Dynkinga skal gjere kaka saftigare, og i tillegg tilføye smak. Ha på eit jamnt og tjukt lag med mascarponekrem. Legg skiver av friske jordbær oppå. Ha på neste lag med botn, og gjenta prosessen med dynking, mascarponekrem og jordbær. Legg på siste botn, dynk denne og med kaffi. Ha på eit lag med mascarponekrem. Pynt med friske jordbær, spiselige blomar(her har eg pynta med epleblomar og kvit syrin), og eit lite dryss kakao. Når ein drysser kakao er det godt å bruke ei lita sil/sikt.

B R O W N I E S

 

Denne brownie oppskrifta har vore min favoritt i mange år, den er god akkruat som den er, og i tillegg er den flott å bruke som kakebotn til mousse, is og ostekaker.

 

Brownieoppskrift: 

4 egg 

2,5 dl brunt sukker(Om du ikkje har brunt sukker, kan du bruke kvitt sukker til alt i staden.) 

2,5 dl kvitt sukker 

1 ts salt 

2 ts vaniljesukker 

6-8 ss kakao 

200 gr smelta smør 

3 dl mjøl 

100 gr god sjokolade, grovt hakka. (Her kan du bruke melkesjokolade, eller mørk sjokolade, alt etter kva du liker best.) 

2 ts bakepulver 

Bland saman alle ingrediensene, men ikkje den grovhakka sjokoladen, til ein jamn masse. Ha så i den grovhakka sjokoladen. Ha alt i ei lita langpanne. (Om du vil lage ei stor langpanne, ei slik som passer i ein standard omn, då kan du doble oppskrifta. Denne passer til ei slik langpanne som du har lokk oppå etterpå. ) Dekk langpanna med bakepapir, slik at du slepp at kaka set seg fast i forma.

 

Steik midt i omnen på 175°C i ca 25-30 min. 

Dette er ein fantastisk brownie! I tillegg til at den er deilig å ete, er den og god til å fryse, og den tiner fort når du skal servere

den.